Eze 22 | MEU | STEP | Iehova ena hereva na egu ai ma e kau, eto,

Ezekiel 22

Ierusalem ena kara dika

1 Iehova ena hereva na egu ai ma e kau, eto, 2 Oi danu, taunimanima natuna, ba hahemaoro heni a? Ina hanua mai rarana ba hahemaoro henia a? Benaini, ena kara dika-rohorohodia iboudiai ba gwaurai henia. 3 Oi na baoto, Ḡaubada Iehova na ini e gwau tomamu: Hanuana binai, bogaraginai rara e hahebubuamu, ena nega baine kau helaoreana, bona kaivakuku e karamu, ia sibona ihamirolaina. 4 Oi na vada o kerere, vada o hahebubua rarana dainai; bona vada o miro, vada o kara kaivakukudia daidiai; emu nega vada o hakwadogia, vada e gwaurai henimu laḡanidia vada e ore. Taunabunai, hedunirai ḡauna ai vada na halaomu, bese idau-idau ediai, bona heḡonaḡonalai ḡauna, tano iboudiai ediai. 5 Harimu dika-rohoroho ḡauna, heloḡo-ahuahu hanuana, e noho hetabiramu taudia bona daudaudia ai e nohomu taudia ese bae ḡonaḡonalaimu.

6 A itaia, oi lalomu ai Israel lohiadia, ta ta ena siahu ena siahu heḡereḡeredia ai, lalodia na rara ihahebubuna vada e uralai bada. 7 Oi lalomu ai tama bona sina na e hahemataidiamu; oi bogaragimu ai noho hedoa tauna na gwaurai-lagau karadia amo e hahisiamu; oi lalomu ai ihareha bona vabu e kara dika henidiamu. 8 Egu ḡau helaḡadia vada o dadaraidia; egu dina helaḡadia vada o hamirodia. 9 Oi lalomu ai haida ese e hahebademu, rara ihahebubuna totona; oi lalomu ai haida ese ororo ai e ani rahimu; oi bogaragimu ai haida ese lebulebu karadia e karamu. 10 Oi lalomu ai haida ese tamadia edia geda e hamirodiamu; oi lalomu ai hahine na edia rara-kara dinadia ai e hahemaraidiamu. 11 Ta na dekena tauna adavana ida e heuda hanaimu; ma ta na rava-maragi hahinena ida e eno boumu; ma ta oi lalomu ai na ia taihuna korikorina ida e eno boumu. 12 Oi lalomu ai haida ese dava e abimu, rara ihahebubuna totona; heatokau monidia o abimu, bona gvaurai-lagau karadia ai dekemu taudia o dadihaidia; vada o lalogu boio. Ḡaubada Iehova na e herevamu.

13 Taunabunai, a itaia, lau ese imagu ruaosi na tutu hekapumu, moni vada o abi koikoi bona rara na bogaragimu ai vada e hebubu daidiai. 14 Baina kara henimu dinadia ai na emu haheauka baine hesiriu eiava imamu bae goada a? Lau Iehova vada na hereva, bona karana do baina karaia. 15 Baina hakarohomui, bese idau-idau bogaragidiai, bona tano idau-idau ai baina hakarohomui rohoroho; bona emu miro na bogaragimu amo baina ha-orea. 16 Bena oi daimu ai lau ladagu baine miro bese idau-idau vairadiai; bena ba diba lau na Iehova.

17 Bena Iehova ena hereva na egu ai e kau, eto: 18 Taunimanima natuna e, Israel besena na momo ai vada ela lauegu ai; iboudiai nasilver bona auri labora-laborana bona auri hururu-hururuna bona auri bona auri metauna lahi lalonai na heheto. Momo ai vada ela. 19 Taunabunai, Ḡaubada Iehova na ini e gwau tomamu: Umui iboumui ai na momo ai vada o hahelao dainai, taunabunai, a itaia, lau ese Ierusalem bogaraginai baina haboumui. 20 Taunimanima esesilver bona auri labora-laborana bona auri bona auri metauna bona auri hururu-hururuna na lahi ai e haboumu, bena lahi e hahururuhururuamu idia ihavevedia totona, unuheto lau ese egu badu ai bona egu badu ḡaraḡara ai baina haboumui, lahi lalonai baina atomui vareai, baina havevemui. 21 Baina haboumui, egu badu ḡaraḡara lahina ai baina pururumui, bena ia bogaraginai ba veve oho. 22 Silver na lahi ai e haveveamu na heto, lau ese egu badu ai baina havevemui; bena ba diba lau Iehova ese egu badu na latamui ai vada na bubua dobi.

23 Bena Iehova ena hereva na egu ai e kau, eto, 24 Taunimanima natuna e, ba hamaoroa, baoto, Oi na asie haḡoevaia tanona, eiava latanai badu dinana ai medu se diho tanona. 25 Ia bogaraginai ena lohia verina na e goumu bona damuna e dareamu leonana na heto; idia ese taunimanima edia mauri vada e ha-oredia; kohu namo-hereadia bona dava bada ḡaudia vada e dadidia, hahine momo vada e havabudia ia bogaraginai. 26 Ena hahelaḡa taudia ese egu taravatu vada e tataia utu, bona egu ḡau helaḡadia vada e hamirodia; ḡau helaḡadia bona ḡau asi helaḡadia asie ha-idaudia, bona ḡau mirodia bona ḡau ḡoevaḡoevadia vada e hatamonadia; bona egu dina helaḡadia asie badinadia; unu amo idia ese lau ladagu vada e hamiroa. 27 Ena lohia verina ia bogaraginai na uda sisiadia na heheto; damudia e daremu, rara e hahebubuamu, bona taunimanima edia mauri e ha orediamu, unu amo kohu e ḡaunai.

28 Ena peroveta taudia danu ahu ai e hedahu, vada e mata hanai koikoi bona vada e bagu haoro koikoi idia daidiai; vada eto “Ḡaubada Iehova na ini e gwau tomamu”, a ḡau be Iehova se gwa. 29 Tano taudia ese dava vada e gwaurai lagau, bona dadidadi karadia vada e kara; ogoḡami tauna bona e dabumu tauna vada e hahisidia, bona noho-hedoa tauna enai dava vada e gwaurai lagau, ena ḡau na asi iabi-louna dalana.

30 Bena idia bogaragidiai tau ta na tahua, maḡu baine haginia, bena e mauru gabuna ai lau vairagu ai baine gini, tano igimana totona baina habuaia tari na garina; a tau ta asina davaria. 31 Taunabunai, egu badu na idia latadiai vada na bubua dobi; egu badu-ḡaraḡara lahina ai vada na ha-aradia; edia kara davana vada na haloua, idia kwaradia ai. Ḡaubada Iehova na e herevamu.